A Festa do Bolo do Pote celébrase na Picota a primeiros do mes de marzo e ten por obxecto o produto culinario que lle dá o nome e que, xunto co cocido, que o complementa, convoca unha multitude ansiosa por recuperar sabores esquecidos ou nunca coñecidos.

O bolo do pote é un produto realizado con fariña de millo, mesturada con fariña de centeo. Para comezar, prepárase un rustrido con anacos de touciño entrefebrado, chourizo ou touciño, que se lle engaden á masa. O resultado compáctase e dáselle forma de bóla. Para a súa cocción utilízase o caldo fervendo. Finalmente, córtase e sérvese acompañado de chourizo, lacón, orella ou calquera outro tipo de carne de porco.